အတက်အကျ

တက်ပြီးရင် ပြန်ကျလေ့မရှိတဲ့ ဈေးနှုန်းတွေလိုပဲ..
ကိုယ်အလေးချိန်တွေက တရိပ်ရိပ်၊

တကိုယ်ကောင်းစိတ်တွေက တလူလူ၊

ထုနဲ့ထည်နဲ့ ထွားကြိုင်းလာနေတဲ့ အတ္တတွေ၊

ထားရာနေ စေရာသွား.. ပစ်ချခဲ့တဲ့နေရာ ကျန်မနေရစ်တတ်တော့ဘဲ

ရှေ့သို့သာလှမ်းချီနေတဲ့ ဘဝင်နဲ့မာနတပ်ပေါင်းစု၊

ဘယ်ဘက်ကြည့်ကြည့် တက်ရိပ်တွေချည်းသာ။
ရှားရှားပါးပါး…… ကျနေဆဲနဲ့ ကျရိပ်ကျခြေ ဆက်ရှိနေတာတခုကတော့

ချစ်ခင်ကြင်နာခြင်းများ။

ပေးစာ၉၉

ကိုယ်ပြောပါကော.. ချစ်ရယ်
ကိုယ်တို့ဝေးကြရင် ကံတွေကောင်းလာမယ့်အကြောင်း။

ကျောခိုင်းပြီးတဲ့ စက္ကန့်ပိုင်းအတွင်း..
ကောင်းကင်ကြီးက လင်းကျင်းလာတယ်မဟုတ်လား
ရှူသွင်းလိုက်တဲ့လေတွေမှာလည်း ပန်းရနံ့တွေ သင်းသင်းမွှေးလို့လေ။

ချစ်သူခင်သူပေါလို့ လာဘ်လာဘတွေပွင့်လန်းလာတယ်
မနက်နိုးချိန်ကစလို့ မျက်လုံးတွေက ပြုံးနိုင်ပြီး
နှုတ်ခမ်းတွေက ညအိပ်ရာဝင်ချိန်ထိ အားရပါးရ ရယ်နိုင်ကြတယ်။

ကိုယ်တွေ ဝေးသွားကြရင် အခြေအနေတွေသာယာလာမယ့်အကြောင်း
ကိုယ်ပြောခဲ့ပါကောလား.. ချစ်ရဲ့။

အညံ့အသက်တွေ အနားမှ မသီနိုင်အောင်
မတော်တဆ အိမ်မက်ထဲ ဖြတ်လျှောက်မိရင်တောင်
မျက်နှာလွှဲသွားကြရအောင်ပါ။

အရူး ၃

မူးယစ်ရီဝေစေသောအရာတွေ ကိုယ်လက်ထဲတွေ့တိုင်း
တွေဝေမေ့လျော့ခြင်း အကြောင်းတရားတွေ ဖြစ်ကြောင်းနဲ့

နောင်ဘဝတွေအထိ အထုံပါနိုင်ကြောင်း

ခေါင်းကို ဒေါက်ခနဲခေါက် ပြောတတ်သူ။
ဆရာဝန်တွေကပြောတယ်.. ဟေ့ရောင်.. မင်းမှာတရားမှ မရှိတာကိုးကွ…

ဒီသီချင်းစာသားကို ကိုယ်တတွတ်တွတ်ရွတ်နေတိုင်း

စိတ်ကလေးသာ လျှော့စမ်းပါကွာလှမ်းအော်ရင်း

တဟားဟား ရယ်တတ်သူ။
အရောင်မပါဘဲ ရယ်လို့ရတာတွေ ရှားပါးလာကြောင်း ကိုယ်ပြောတိုင်း

သူ့မျက်နှာ ခဏ.. ခဏ.. တည်.. တည်သွားတတ်တော့..

တမင်တကာများ.. 

စိတ်တိုင်းကျ ရယ်မောနိုင်တဲ့ အခွင့်အလမ်းကို ရွေးချယ်သွားလေရော့သလား။
ပတ်ပတ်လည် ကြည့်ရင်း ရယ်မောနေတတ်ကြောင်းနဲ့

တောက်လျှောက်ပြုံးနေတော့တယ်… လို့ ပြောပြကြတော့

အရောင်မပါတဲ့အပြုံးတွေမှာ ဗလာမျက်လုံးတွေနဲ့ပေမယ့်

စိတ်ညစ်ညူးစရာတွေတော့ သူမေ့သွားပြီထင်ပါတယ်။
ဆေးမှန်မှန်သောက်နော်..လို့.. 

ကိုယ်ပြောမထွက်လို့

နဖူးက ဆံပင်လေးသာ သပ်တင်ပေးခဲ့တယ်။

ဝေး

မျက်တောင်တခတ်တိုင်း အလွမ်းတပွင့်စီနဲ့.

ဖြူတူတူဦးနှောက်တွေက သူမှတ်မထားဘူးလို့ပဲ.. တတွင်တွင်…

ပထမဆုံးအနမ်းလို့ ကြားတိုင်း မျက်ခုံးဆီကို.. သွားသွားစမ်းမိတာ အကျင့်ကိုစွဲလို့…

ဒီဇင်ဘာည 🎼 သီချင်းသံမကြားမချင်း မထဘူး.. ဆိုလည်း ခေါင်းအုံးတခြမ်း အအေးပတ်ရုံထက်တော့ ပိုမလာတော့ဘူးလေ…

မျက်လုံးဖွင့်ကြည့်တိုင်း မြင်နေကျ….. ပါးချိုင့်လေးနဲ့တော့ တဘဝစာ….ေ..ဝဝဝ…းးးး….

အရူး ၂

ခပ်လေးလေးအရာတွေကိုပဲ သယ်ထားချင်ခဲ့တဲ့ အရူးတစ်ယောက်ရှိဖူးတယ်
အရူးဆိုတော့ အကန့်အသတ်ရယ်လို့ မသိရှာဘူး။

မလှုပ်နိုင်မရှားနိုင်နဲ့ အသက်ရှူတွေခက်လာတဲ့နေ့ကပေါ့
အရူးလည်း တကိုယ်ကောင်းဆန်တတ်တယ်။

ဆူလွယ်နပ်လွယ်အရာတချို့ကိုပဲ သယ်ပြီး
ခပ်ကော့ကော့သာ ခရီးဆက်ခဲ့တော့တယ်။
ဘာတွေပစ်ချခဲ့လို့ ဘာတွေသယ်သွားမှန်း အရူးလည်း ချက်ကျလက်ကျတော့မသိပြန်ဘူးတဲ့။

ရယ်ပြရမယ်လို့ အချက်ပေးရင် သွားလေးဖြဲလို့
ငိုမှလို့ အသိဝင်ရင် မျက်ရည်တစ်ပေါက်နှစ်ပေါက်လောက်နဲ့
ပျော်ပျော်ကြီးရှေ့ကို သွားလေရဲ့။ (အရူးကတော့ သူ့ကိုယ်သူ ပျော်ပျော်ကြီးလို့ သတ်မှတ်တယ်။)

တခုခုတော့ ပျောက်နေတာ အရူးသိသလိုလို..ဆိုပဲ
အရူးမသိတာက အရူးဟာ တဖြည်းဖြည်းနဲ့ အရာဝတ္ထုကြီးတခု ဖြစ်လာတာပဲ
အသက်သာ ရှူနေပြီး သူတယောက်စာပဲ အသုံးဝင်တဲ့အရာဝတ္ထုကြီးပေါ့။

တစ်ရက်..
လူပြောသူပြောများလို့..
ပစ်ချထားခဲ့တဲ့အရာတွေဆီ ခရီးသွားဟန်လွဲဝင်ကြည့်ဖြစ်တော့….
အချစ်ရယ်လေ….
ဖုန်တွေ ပင့်ကူအိမ်တွေကြား ငုတ်တုတ်ကလေးရယ်မှ ထိုင်လို့။ ။

အရူး

မမှီတဲ့အကြောင်းတွေကိုက များပြားလှတယ်..
တွေးတောမနေတော့ပါဘူး .. ချစ်ရယ်..
ကိုယ့်ဥာဏ်ရည်ကိုက ကူးလွယ်ခတ်လွယ် ခပ်တိမ်တိမ်ရယ်။

အိပ်မပျော်တိုင်း ကြယ်တွေရေကြသတဲ့..
ကိုယ့်မှာတော့ မျက်လုံးအကြောင်သားနဲ့
ရေစရာ ကြယ်ရယ်လို့ကို ရှာမတွေ့နိုင်ဘူး။

တသန့်တပြန့်ရယ်လို့ ဘယ်လိုပြောပြော
ကိုယ်ကတော့ သဲတရှပ်ရှပ်နဲ့လည်း ကျေနပ်လိုက်တာပဲ
အမြဲတမ်းမှ ရေဆေးမနေနိုင်တာကော။

ရာသီဥတုက မသိမသာလေးအေးလာပြီ.. ချစ်ရဲ့..
မိုးလေဝသက ဘာပြောနေနေ..
ကိုယ်ခံစားမိတာကိုပဲ ကိုယ်ကအသဲအသန်ယုံတယ်။

အပေါ်ရော အောက်ရော.. ဘာကာရန်.. ဘာချိတ်ဆက်မှုမှ ရှာမတွေ့နိုင်ဘူး..
ဘယ်တွေ့မလဲ ချစ်ရယ်..
ကိုယ်က အရူးကိုး..
ဒါက အရူးချီးပန်း ခပ်နှမ်းနှမ်းတွေရယ်လေ။

အမှုမဲ့

သူ.. အသားအရေတွေ မွဲခြောက်လာတယ်..
သူ ပစ်စလက်ခတ်နေတယ်လို့ ကျွန်မက ထင်တုန်း။

သူ.. ဝုန်းခနဲ ပိန်ကျသွားတယ်..
သူ အလည်လွန် အပျော်အပါးလွန်နေတယ်လို့ ကျွန်မက ထင်တုန်း။

သူ.. တော်ကြာ ဝဖောင်းဖောင်း ပွယောင်းယောင်းဖြစ်လာတယ်..
သူ မတရားစားသောက်နေပြန်တယ်လို့ ကျွန်မက ထင်တုန်း။

သူ.. မျက်လုံးတွေ ဝေဝေလာတယ်..
သူ မအိပ်မနေ ရုပ်ရှင်တွေကြည့်ပြန်တယ်လို့ ကျွန်မက ထင်တုန်း။

သူ.. ကြည့်လိုက်တိုင်း တဟားဟားနဲ့..
သူ ဟေးလားဝါးလားကြိုက်သေးတယ်လို့ ကျွန်မက ထင်တုန်း။

သူ.. ချက်ချင်း ငြိမ်ငြိမ်ကျသွားတယ်..
သူ အိုဗာတွေ သိပ်လုပ်တာပဲလို့ ကျွန်မက ထင်တုန်း။

သူ.. ခုပဲကြည်လင်လိုက်.. ခုပဲမှုန်မှိုင်းလိုက်..
သူ အပြောင်းအလဲ သိပ်မြန်တာပဲလို့ ကျွန်မက ထင်တုန်း။

သူ.. တနေ့လုံး အိပ်အိပ်နေနိုင်တယ်..
သူ အပျင်းထူ ဇိမ်ယူပြန်တယ်လို့ ကျွန်မက ထင်တုန်း။

သူ.. ဘယ်တော့မှ ပြန်မလာတော့ဘူး..
သူ ပုန်းနေတယ်လို့ ကျွန်မက ထင်နေတုန်းပါ။