မာမားကြက်သားဆီချက်တထုပ်၊ စီပီကြက်အူချောင်းနှစ်ချောင်းနဲ့ သီးစုံကြက်သားလုံးသုံးလုံး၊ ရေညှိခြောက်ဖြူး။
တကယ်စားချင်တာက facebookမှာကြည့်တဲ့ ယိုးဒယားမလေးတွေ အိုးကြီးတွေနဲ့ ချက်ချက်ပြတဲ့ ခေါက်ဆွဲခြောက်ကို အစပ်မျိုးပေါင်းစုံနဲ့ စားချင်တာ။အစပ်ကတော့ မစားရဲလို့ ……… ဒါက ဖြေသိမ့်စာပါ။
သူရဲဘောကြောင်သလောက် အပျင်းတော့လည်းထူတဲ့ တနင်္ဂနွေနေ့။
သရက်သီးမှည့်ကို ကျိတ်တယ်။ ဒီအတိုင်း ၃ဇွန်းလောက်သောက်လိုက်သေးတယ်။ ဗိုက်ပြည့်ပြီး အီတယ်။ အရင်နှစ်က တကူးတကမကြုံကြုံအောင် သွားသွားသောက်ခဲ့တဲ့ မင်္ဂလာမန္တလေးထဲက အသီးဖျော်ရည်ဆိုင်လေးဆီက သရက်သီးဒိန်ချဉ်ကိုသတိရ။ ရောပစ်ဖို့ ဒိန်ချဉ်ရှာတော့ ဘလူးဘယ်ရီဒိန်ချဉ်ပဲရှိနေတော့တယ်။ ရှိတဲ့ Lemonade ကိုပဲရောထည့်ပစ်ပြီး Mango Lemonade လုပ်ပစ်လိုက်တယ်။
သရက်သီးတွေ ဖျော်ပစ်ရတာ အကြောင်းရှိတယ်။ အဖေစျေးကနေ ၂၀၀တန်တွေ ဝယ်ဝယ်လာလို့ စိတ်တိုပြီး online ကမှာလိုက်တာ။ အစက ၁၅လုံးလောက်မှာဖို့ကို ရောင်းတဲ့ ညီမလေးရဲ့ အသံပျော့ပျော့ကို အားနာတာနဲ့ တခြင်းလုံး ၂၀၀၀၀ နဲ့မှာလိုက်တာ။ ပို့ခ ခြင်းဖိုး ဘာညာနဲ့ ၂၄၀၀၀ ကျတယ်။ အလုံး၅၀ပါတယ်။ အဖေ့ကိုတော့ ၂၀၀၀၀ လို့ပြောတာပေါ့။ ကံမကောင်းတာက အကုန်မှည့်နေပြီ။ သရက်သီးမှည့် ပေါ်ကာစက တယောက်စီက မှာဖူးသေးတယ်။ သူက အမှည့်၊ အုပ်ထားဖို့ လိုသေးတာ စသဖြင့် ရောထားပေးပြီး လတ်တော့ အထားခံတယ်။ ဖြည်းဖြည်းချင်း စားလို့ရခဲ့တယ်။ ခုတခါက မှည့်နေပြီး ပူလည်း ပူဆိုတော့ကာ သရက်သီးမှည့် အလုံး၅၀နဲ့ ကြံရာမရတော့ပြီလေ။ ကိုယ့်တာဝန်ကိုယ်ယူပြီး၊ အသီးလည်းစား၊ ဖျော်လည်း သောက်ရတာပါပဲ။အဆင်မပြေရင် ရေခဲချောင်းပါ လုပ်ရတော့မယ်။
cheese cakeကတော့ city mart သွားရင်း လမ်းကြုံဆွဲလာတာ။ အရမ်းကြိုက်တဲ့အစားအစာတွေဟာ တယောက်တည်း စားရင် သိပ်ခံတွင်းမတွေ့ပါလားလို့ သေချာသိလာတဲ့ ဒီနှစ်ထဲ.. ။ ရယ်စရာကောင်းတာက ဒီလိုပဲ စားတာကတော့ စားဖြစ်နေတာပါပဲ။
Anne Marie ရဲ့ 2002ကို version ပေါင်းစုံ ပျင်းရိစွာ နားထောင်ရင်း မျက်စိရှေ့က အကုန်စားရမယ့် နေ့လည်ခင်းပေါ့။
သတိတရပြန်ရောက်လာတယ်။
ဘာရယ်မဟုတ်..။ စကားပြောချင်တာ။
အာရုံတွေ စူးစိုက်လို့မရတဲ့နေ့ရက်တွေ၊ ဘာကိုအလိုမကျမှန်းမသိတဲ့နေ့ရက်တွေ၊ အထီးကျန်တယ် ပြောရမှာ ရှက်စရာကောင်းတဲ့ ဒီလိုနေ့ရက်တွေမှာ သတိတရ ပြန်လာကြည့်ဖြစ်တာမျိုးပေါ့။
ဘာမှဖတ်မရတဲ့အတူတူ အကုန်ဖျက်ပစ်လိုက်ဖို့က ပိုကောင်းတာ။ တကူးတက ပြန်ပြောင်းဖို့လည်း စိတ်ကူးမှမရှိဘဲကို။ အထွေအထူး စွဲလမ်းနေလို့လည်း မဟုတ်.. ဖျက်ရမှာ ပျင်းနေတာ။
တခါတလေ ဟိုရေး ဒီရေး လာရေးတာပေါ့… တွေး။ တွေးတာပေါ့…လေ။
ကိုယ်ပြောပါကော.. ချစ်ရယ်ကိုယ်တို့ဝေးကြရင် ကံတွေကောင်းလာမယ့်အကြောင်း။
ကျောခိုင်းပြီးတဲ့ စက္ကန့်ပိုင်းအတွင်း..ကောင်းကင်ကြီးက လင်းကျင်းလာတယ်မဟုတ်လား
ရှူသွင်းလိုက်တဲ့လေတွေမှာလည်း ပန်းရနံ့တွေ သင်းသင်းမွှေးလို့လေ။
ချစ်သူခင်သူပေါလို့ လာဘ်လာဘတွေပွင့်လန်းလာတယ်
မနက်နိုးချိန်ကစလို့ မျက်လုံးတွေက ပြုံးနိုင်ပြီး နှုတ်ခမ်းတွေက ညအိပ်ရာဝင်ချိန်ထိ အားရပါးရ ရယ်နိုင်ကြတယ်။
ကိုယ်တွေ ဝေးသွားကြရင် အခြေအနေတွေသာယာလာမယ့်အကြောင်းကိုယ်ပြောခဲ့ပါကောလား.. ချစ်ရဲ့။
အညံ့အသက်တွေ အနားမှ မသီနိုင်အောင် မတော်တဆ အိမ်မက်ထဲ ဖြတ်လျှောက်မိရင်တောင်မျက်နှာလွှဲသွားကြရအောင်ပါ။
HoLOLo....DiLoLO 